आजच्या दै सकाळ मध्ये 'चिन्ह'च्या "गायतोंडे" ग्रंथाची एक भली थोरली बातमी आलीये.
"गायतोंडे" पहिली आवृत्ती संपली म्हणून , मला सुतराम कल्पनाही नव्हती की अशी काहीतरी बातमी येईल याची.चार सहा दिवसापूर्वी एक फोन आला होता सकाळमधूनबोलतेय म्हणून, त्यांनी " गायतोंडे " ग्रंथाविषयी विचारणा केली, मी सारी माहिती दिली.फोन ठेवताना मीविचारले देखील की तुम्ही बातमी देणार आहात का? तर असंकाही ठरवलेलं नाही,पण या ग्रंथाविषयी खूप उत्सुकता होती, म्हणून फोन केला होता, असं उत्तर आलं. आता त्यावेळी त्यांनी हे सारे छापणार असे सांगितले असते तर मी त्या ग्रंथाचं नवं, बदललेलं मुखपृष्ठ दिलं असतं. तेही बातमीत आलं असतं तर अधिक बरं झालं असतं.
आधीच्या मुखपृष्टामध्ये आणि नव्यात बदल हा की त्यात गायतोंडे या शीर्षकाला महत्वाचे स्थान दिले आहे,आधी कळत नकळत 'निवडक चिन्ह'ला विशेष महत्व दिले गेल्या सारखे वाटत होते.कोलतेसरांनी हे लक्षात आणून दिल्यावर आम्ही तो बदल करायचा निर्णय घेतला.आता अंतिम मुखपृष्ठ हेअसे असणार आहे. मलपृष्ठ देखील बदलले आहे, आता त्यावर गायतोंडे यांचा स्टुडियोच्या गल्लीत काढलेला फोटो नसणार आहे त्या ऐवजी गायतोंडे पेंटिग वापरलं जाणार आहे.
अंक किंवा ग्रंथ छपाईला जात असताना हे असे बदल होतंच असतात. ते त्या अंकाच्या किंवा ग्रंथाच्या गुणवत्तेत वाढच करीत जातात, म्हणूनच चिन्हच्या प्रत्येक निर्मितीला प्रत्येक वेळी जास्तीत जास्त वेळ लागत असतो.पण चिन्हचे वाचक मोठ्या प्रेमानं हे सारे सहन करतात म्हणून हे सारे जमते, जमू शकते, जमवता येते. त्या मुळेच "निवडक" आगामी तिन्ही प्रकाशनांच्या निर्मितीत कोणतीहीकसूर ठेवायची नाही आणि वाचकांनी विश्वासाने जे भरभरून दिले आहे त्याची अगदी सढळ हातानं सव्याज परतफेड करायची असा चंगच बांधलाय, कसे काय, ते मात्र आता सांगणार नाही, लवकरच जाहीर करतोय, आता फक्त थोडीशीच वाट पहा……
